Arif MOLLIQI: N`ATË TETOVË PO THËRRET TELALLI

(Fragment nga libri satirik “Kreshnikët e Boksh Barutit”, botoi ShB “Beqir Musliu”, Gjilan,
2023)

N´atë Tetovë po thërret telalli
ngrihuni djem se u hap pazari
ngrihuni djem se shkoi trimnia,
deputet janë ba dhe fëmija.
Shkoj trimnia n´haxhillëk,
Parlamenti me deputet.
N´Gostivar e në Kërçovë,
Dibër Shkup e n´Tetovë,
n´kafehane dhe xhamia
politikë bajnë edhe fëmija.
N´politikë kush po na prinë?
xha Abazi si vetëtimë,
n´Kapital ka dhanë betim:
Pasha Xhaxhin, e n´krye të Stalinit,
Mao Ce Dunin... e latinin,
për të gjallë s’e ndërroj drejtimin.
S´jap dorëzim pa hangër bar
kështu me mësoi nëna e parë.
Kështu e mësoj Nënë Parti,
mos m´u prish as më kojshi.
Fjalët e saj kur i harroj
vjen ky Tosi m`i kujton,
vjen ky Tosi vjen Hysni-a...
ma kujtojnë çka ashte burrnia;
se n´Tetovë ka ardhë liria
me bordel e me sharkia.

***

Kush na vjen pas kësaj trimnisë,
Mendi trimi, fika e shtëpisë.
Për biznes e njeh Tetova,
pak ma larg edhe Kosova.
E njeh greku, e njeh bullgari,
shkau e romi dhe maxhari...
Se çka hynte brenda n´doganë
ai gjithmonë jepte imzanë.
Se çka flet nëpër mbledhi,
n´konferenca e medie,
nëpër kafe e n´qeveri...,
ia shkruan Xhafa me kalem të ti,
ia shkruan Xhafa me lezet,
gjysma e popullit s´e merre vesh...

****

Për këta trima ju dëftova,
Rrahman abejin nuk e harrova.
E di vetë, kujtoj zotnia
se sa e rëndë është atdhedashuria...
Ndoshta vetë e di Rrahmani
sa vështirë është punë vatani
me Georgevskin e Aleksandrin.
Ky Rrahmani n´parlament,
i kap punët me siklet
më të gjithë na lidh ujdi:
-Rroftë Tetova, qeveria,
rroftë bullgari, rroftë Turqia
na rroftë serbi, Maqedonia...

( “Ngucakeqi”, 2000 dhe, “Java Shqiptare”, 2001) 

Read More

Prend BUZHALA: KUVÊNDI

(Parafrazë lirike gege)

Si âsht vêndi bahet kuvendi.

Me pleqnue punë me mênd.

Pleq thirren edhe burrat ma në zâ për urti.

Fjalën tande e thue në Kuvênd si të ka hije,

për mbasardhësit tu,

Si Zot i Vendit tand. Si në Mbledhjen ma të Shejtë,

Si në Kuvêndin ma Madhështor. Si në Festën e Zotit.

Ke përlimjen tande, tagrin tand e zânin tand aty.

E ke ti edhe amanetin tand:

si me rritë djem trima e kuvendarë.

Si me u bâ burrë i Fjalës, si me e pre fjalën në atë log.

Si me i dalë zot familjes, drejtësisë,

Si me punue për të mirën e vendit.

Si mos me i bâ lak Fjalës e Të Vërtetës.

Si me u zgjedhun ndër burrat ma në shêj.

Si me u bashkue me krenë e t’Parë t’ Vendit.

Si me kuvendun fjalë burrnie

e si me e çue peshë nji fis e nji krahinë.

Si mos me i lânë marre as shpisë e as Shqipnisë.

Si gjithmonë nëpër histori,

si me ngrehun Kuvêndin e Lirisë.

Ka me të ndodhë që në Kuvêndin e Të Drejtëve

flasin, shpërflasin e vendosin mëkatarët e të ligjtë.

Ashtu si kanë thirrë kuvênde kundër teje,

si me të shtypë e shnjerëzue.

Nën zgjedhë të huej rrin në krye të vendit ma i keqi,

Të ban gjyqe jashtë drejtësisë e jashtë Fjalës së Drejtësisë.

E ban me ty gjithçka i teket. Të len pa shpi e pa Atdhe.

Nuk ka si me shkue drejt rruga e të pabesëve.

Hyji i njeh rrugët e të drejtëve,

ashtu si i njeh zemra e Njeriut.

Ti ke bekimin tand për Atmen.

Ti e ke Kuvêndin Tand të Bekuem

për Atme e për Punë të peshueme.

Si nëpër tubime orësh e shejtnorësh,

kur i ke kremtue krejt mrekullitë.

E Plaku ka thânë:

zâ të madh për ty kam ndie, si burrë e kuvendar.

Aty, faqe botës,

dinë si me i shpallë zotimet tua e drejtësinë tânde.

I rrethuem me anmiq që shartojnë zî e prozhmojnë pa nda.

Lidh Besë shqiptare si dikur nëpër zjarme luftnash.

E sot: nëpër dengjet e paqes.

Si me nxanë vend në Atë Këshill të Të Drejtëve.

E tash e thue Fjalën e Peshueme për Të Vërtetën Tande,

në Kuvende Kombesh.

(25 maj 2016)

Read More