Ramiz Kuqi: Cikël Poetik

BILBIL

Vjen ai zë me nota të akorduara
Më bukur se në pentagram
Dita mbyllet këtu në agim
Fjalët derdhen nëpër stinë
Si zjarret e pashuara
Një sharrë gjëmon mbi drunj
Gdhencat shpërndahen
Mbi bar të kositur
Si loti kur bie
Mbi faqe libri valë
Bilbil...

KUR NGOJËZOJET FJALA

Pena dridhet mbi fletën e bardhë
Dosje hapën për zogjtë cicërues
Koha matet me orë
Delli nxjerr kokën mbi varg
E bukura lidh fijet e flokëve
Si bishtalec të gjatë
Shndërrohet në vig mbi lum
T'i lidh dy brigje dy buzë atdheu
Të puthën malet me male
Në sy Evropës
Lë të mbijë një trëndafil i ri
Qiellit të fluturojnë
Ëndrrat e ngujuara
Për një udhë lirie
Nënat të tjerrin në furkë
Fijet e reja të lëmshit
Për një qilim të kuq
Buzëkuq
Me shqiponjë
Kur ngojëzojet fjala
E kufiri ruhet me qen
E pranga
Mbij ti lule
Mbushi shkrepat sheshet
Me aromë dashurie!

NË SECILIN MAL

Bie një fyell
Për t'i zgjuar nga gjumi
Ëndrrat e fjetura
Zogjtë , trumcakët
Vashat llerëpërvrshura
T'u thurin këngë bandilave
T'i grishin në lëmë
Kur hëna zgjat kokën mbi gërxhe
T'ia puth sytë ylberit
Atdheut të ndarë në copëza folklori
Në secilin varg është një fjalë
E bukur si mjalta në hoje bletësh
Në secilin mal bie një fyell!
T'i zgjoj mërgimtarët
T'i puthin shkronjat e Abetares
Të dëgjojnë zërin e nënës
Mbushur me rrudha malli
Në shtëpinë e heshtur
Pa zëra fëmijësh
Në secilin mal...

PO PI

Me fjalën
Mikë time të vjetër
Të pagjumën
Poezinë
Gotën e mbushur plot
Me dashuri e dhimbje
Që po ma braktis vargun
Cdo ditë
E mi grimcon
Ëndrrat e lumnisë
Që i thura dikur
Si me laurë
Nga ndonjë lundërtar
I stërvitur
Që can
Detin nëpër valë
Po pi
Shiun që bie rrëke
Buzë detit fjordeve
Të dimrit tim
Po pi...

E DIEL

S'ka më bukur kur zbret nëpër vargje dielli
Veshur fjalët zbukuruar si nusja veshur me ar
Largon mjegullat e dendura kokëzgjatura në qiell
Rikthen buzëqeshjen e humbur ditën ta mbush me mall

E diel...

ÇAST LIRIK

Me sy e mendje nga Jugu
Trupin në fjorde
Udhëve pa emër
Ëndrrat në Jug
I masim
Hapat nëpër asfalt
Shputat
Të digjen nëpër shi
Fjala loton nëpër vargje
Sy e mendje nga JUgu
Zogj të harruar
Strukur
Nëpër skuta të shpirtit
Si këngë e lodhur
Nëpër pllaka telefonash
Çast lirik...