Servet Bytyçi - BALADAT E DRINIT !

Zemra ime lumë me valë
kur vërshon e del prej shtratit
ka me ardhë tek ti me u ndalë
në ato kodrat e Myç-Hasit.

Kam me dalë me nejtë përmi
e me u ulë te Rrethi i Bardhë
bash si re e zezë me shi
se për ty malli më ka marrë !

Kur të fillojë dimri me ardhë
e të nisë të bjerë borë
ke me u dukë si kapuç bardhë
bora-shall i lidhë kurorë .

Aty nata ka me më pru
në një andërr një kujtim
ku kam shkelë e kam kërku
nuk kam gjetë si vendin tim .

Kur bilbili nisë me këndu
nisë ma parë se në çdo vend tjetër
kangët ma të mira këtu i kam dëgju
në këtë strehë kasolle të vjetër

Buka thatë m'ashtë dukë si mjaltë
e fjale e babës si qelibari
prehni nanës që m'ka mbajtë
e mësu me folë qysh folë shqiptari !

Kur del dielli plot me dritë
ka Gjalica e kah Pikëllima
kur errë dita e vrâhet moti
ushtojnë maja e lugina .

Këtu në vapën e Korrikut
e në borën e Janarit
duket mal i Koretnikut
e gjer larg në bjeshkët e Sharrit .

Ushtojnë maja edhe prroje
turbull poshtë kur i sjell nata
gurrgullojnë gurra e kroje
Drini plak këndon balada !

Londer 4/12/2016