Arqile Gjata: NË FUSHËN E SHAHUT

Kur luaj shah
kujtesa ime ngjizet në sytë e të gjallëve.
Nga fusha e shahut
shkëpus pemë,
i mbjell nëpër male.

Tek ajo lëndinë me kuadrate përgatis lodra për fëmijë,
dhuratë për të verbër.
Fusha e shahut varrezë e lavdishme
me ushtarë e kuaj të bardhë
si muze i vjetër në zemër të kohës.

Nëpër kuadratet e shahut ka dhe trima
fillojnë e vdesin në moshë të rinisë,
lënë pas stinën me figura të përgjakura.

Gjatë betejës së shahut
Mbretëresha,
si soprano e muzikës klasike
qanë mrekullisht humbjen, pas pak
Mbreti i verbër
do të kapet MAT
në oazën e pikëllimit!