Thursday, May 11, 2017

Ymer Nurka: KAMELEONI DHE PARTITË

 (fabul)
Të gjtha qëniet e natyrës
Bënë parti sipas ngjyrës.
Në parti zë vënd të parë
Kameleoni si anëtar

Shfaqet në Partinë e Blertë
Autoritar goxha i sertë
Në Partinë ngjyrë kafe,
Diplomat me shumë llafe

Në Partinë ngjyrë hiri,
Ndër udhëheqësit më i miri.
Në Partinë ngjyrë blu
Do t’i rrinë veç gatitu.

Ndërsa në Partinë e Kuqe
Revolucionar me huqe.
Në Partinë Portokalle
Bashkë me popullin qan halle.

Ndërsa në të Verdhën Parti
Ngrihet bën filozofi.
Në Partinë ngjyrë rozë,
Fjalë bardhë e zemër blozë

Në Partinë ngjyrë limoni,
Thërret "Poshtë revolucioni!"
Në Partinë ngjyrë deti,
Vaj vatani mjerë mileti!

Në Partinë me ngjyrë të zezë
Kameleoni seç bën vezë.
Ndërsa në Partinë pa ngjyrë
Politikan i pa fytyrë.

Në çdo parti, në çdo kolor
Deputet dhe orator.
Mos o zot sikur mbi fron
Mbreti të jetë kameleon!

0 comments:

Post a Comment