Ramiz Kuqi: Cikël Poetik

MOS U HIDHËRO

Fjalë

T’i kam borxh ëndrrat
Që s’ti futa nëpër vargje
Disa më iken
Si album i grisur
Nëpër ditar jete kanë mbetur
Pa pikë
Mos u hidhëro !

IK TI ËNDËRR

Nga kjo dhimbje sonte
Ik
Më lë të pushoj
Mbi këtë flamur malli
Ta ndjej aromën e tokës
E të një dielli
Që do të ndricojë
Mbi këto harta Ballkani
Ik
Ti ëndërr e keqe
Që ma prish gjumin në mesnatë
Ku mbetën zogjtë e mi
Ku
Në cilën lëvozhgë të fjalës
Flejnë
Akrepat paskan ikur
Mbi orën varur në mur?

ERDHA

U takova me malet
Udhët
Lulet nëpër metafora

Po stina
M'u duk me borë
Qielli pa zogj

Një shqiponjë fluturoi
Drejt një Kepi me dëllinja !