Sinan Kërpaçi: Dy poezi

DY PËRGJIGJE

Nga “Te Shqiponja”
deri te burgu im
janë njëqindenjëzet kilometër:

për t`u futur në burg
dhe për të dalë prej tij.

“Te Shqiponja” iki nga Tirana,
“Te Shqiponja” futem në Tiranë:
dyqindedyzet kilometër në ditë
për një mujore gardiani treqind dollar.

Kur më kërkojnë adresën
u them: “Te Shqiponja”
sikur u përgjigjem: “Këtu!”,
kur më pyet e jetës: “Ku je?”
s`i them “Te Shqiponja”,
por “Në krahët e tu
si në burg dhe jashtë tij.

MULLIRI KU PIQEN UDHËT

Për të ndjerë si rëndon guri
më duhet të iki larg.

Si rëndon një gur mulliri
atje tek piqen dy udhë,
kur bluante varfëria.

Shuanin urinë të dyja
në një mokër
dy që vazhdojnë të piqen:
ditëve të mia sillen,
përtej gurit të mullirit.

Për katër unë iki larg:
mokër, mulli, katarakt
dhe dy me dredha që piqen
viseve ku rëndon guri.