Lulzim Breznica: BINI DAULLE

Në mes të kësaj rruge të zgjatur
Si duket paskemi lindur
Binjak me kohën e premtimeve
E fryrë me zjarrin e mpleksur
Të durimit.

E sheh që na mashtruan
dhe i morën të gjitha,
Kohën ,rininë ,dashurinë
Atdheun.
Na lanë si Samsonin e lidhur e të verbuar
Në tempull.

Bini daulle,
Ju të shumëpriturat,
Bërë nga lëkura e gjoksit tim, të copëtuar
Kjo ngricë të jap shpirt në mesnatë,
S'ka më nevojë për lutje ,
As thirrje në veshin e shurdhër.

Bini daulle,
Koha po ikën,
Se më as vdekja s'do t'na do.