Sabit Rustemi - PRAPË BËHEMI MAL

( Shkrimtarit Ibrahim Kadriut, në ditëlindjen e Tij )

E pshtjellëm udhën nën hapa
Shkodër e Shkup e Shkup e Shkodër
E gjurmët nën palët e thella të kujtesave

Diku na mbeti një urë
diku një shteg
një shtëpi e posanisur diku
a një mulli

Sa koha u blua e u gri nën ujë
thinjave tona që s'binin
male pipthash buluan

Kreshtave të Karadakut pastaj
me t'lemen e diellit u zgjuam e gjallnuam
e lëkura e lëkura stinëve ndërruam
si ai gjarpri ilir që s'thumbon pa e prekur

Sërish morëm udhë u shkepëm
kush malit kush fushës e kush shehrit
"se duhej gjalluar mes mishit e thoit"

Tash një fjalor nuk i përthekon emrat
as një krahinë s'i nxë më lisat e plisat
e le më veprat

Mësuar jemi të rrojmë në këmbë
si lisat të shtjerremi vertikal
derisa ajo teshë e ftohtë t'na pijë përngadal

Pastaj nga mali i prerë prapë bëhemi mal

( 8 janar 2017 )