Sinan Kërpaçi - Kostumi i gurit

Në gardërobën e shekullit të ri dhe të vjetër
e kam një kostum që nuk griset edhe unë,
e nxjerr nga vitet dhe e quaj veten me fat,
varur e mbaj në kremastarin e kujtimeve
me etiketën fringo “Kostumi i Gurit të Gjatë”.

Nga bujani tri pëllëmbë më vjen kostumi i nënës
në fluturimin nga shkëmbi për notin “fundo”
që vetëm “Bujani i Gurit” e dinte se ç’qe.

Deti i fëmijërisë nuk i lejoi kurrë nepërkat
të kafshonin te vendi ku trembesha unë
e merak e kish edhe vetë nëna.
Rrotullonin bishtin dhe gjuhën “nepërkë"
dhe loznin gjithë ditën me mua brenda.

Bujani i kish dhënë fjalën asaj që më preu kostumin
se nuk do ta gjente kurrë gjë djalin.
Ndaj edhe shkoj: të më ruajë nëna “lakuriq”.