Kujtim Stojku - GËZUAR FESTËN KOSOVË

Pavarësia erdhi përmes gjakut dhe vdekjes,

Nga heronjtë që dhanë jetën si me le,

Erdhi pas shtypjes gjakatare të tiranit,

Kur të gjithë kundër tij u bashkuam në një zë.

Në këtë festë të madhe fishekzjarrët lulëzojnë qiellin

Dhe dielli me rreze të arta plot hare po buzëqesh.

Nga lotët dhe gjaku lulëkuqet kudo po çelin

Shpirtrat e të rënëve përmes këngëve janë mes nesh.

Në këtë ditë sot liria buzëqesh si nuse e bukur.

Dëgjoj amanetin që ushton fuqishëm nga varret,

Për bashkimin kombëtar së bashku sup më sup strukur

Kjo detyrë sublime ne sot duhet ta kryejmë të parët.

Unë përkulem me respekt para kësaj dite të shenjtë,

Kur pëllumbat e bardhë fluturojnë qiellit gjithë gëzim,

Ata janë lajmëtarët e paqes midis luftës dhe vdekjes,

Me vështrimin pas, ne thërrasin fort për bashkim.

Nga mijëvjeçarët ne erdhëm të gjakosur në këtë ditë,

Me shqiponjën mbi krye që na printe drejt lirisë,

Sot mes kësaj hareje të madhe festive, plot dritë,

Kosovë të uroj nga zemra, gëzuar festën e pavarësisë!

Nga libri "Jam bir i shqipes".