Ramiz Kuqi: Tre Poezi

ËNDRRAT E LENTIT

( Sot mbush katër vjet)

Babi t’ia blej një ABETARE
T’i mësoj shkronjat e Atdheut
Një kasolle me shtatë thupra
Dhe një portret të Skënderbeut

Gjyshja ta fus në djep kur bie nata
T’i rrëfejë për luftën e Adem Jasharit
Gjyshi ta merr verës kur celin lulet
T’ia thotë këngës për lirinë t’i prek malet e Sharrit

Lenti lazdran ka shumë dëshira
Të bëhet një ditë pilot
Të fluturoj mbi tokën e Shqipeve
Që shtatë thuprat të bëhen me NJË ZOT !

PËRPIQEM T'I MBLEDH

Si lulet e ngjyrave kuq bardh zi
Në dritën e parë të diellit në pranverë
Ëndrrat e natës në vjeshtën e vonë
Dhe s'i mbledh dot

Janë strukur si zogjtë e mërdhirë
Nga era me shi të ftohtë kujtimeve
Fjordeve deti ka nisur të ngrijë
E s'i bart as mbi letër të bardhë

Fjala ka hyrë në mërzinë e stinës
Kokëforta
S'e duron dhimbjen mbi varg
As sytë e përgjumur nëpër strofë

Përpiqem t'i mbledh...

DRUAJ

Se fjala më është lodhur
Kjo mike e netëve pa gjumë
Si varkë me lopat i hap dallgët
Dhe ëndrrat e heshtura m’i tund